زوجي عصبي ولا يعجبه العجب كيف أتعامل معه؟

انا متزوجة لي ٥ سنوات ومن يوم خذت زوجي وانا وياه في مشاكل عندي ولد وحامل كل مرة اقول بيتعدل ولكن للأسف مااشوف شيء الصلاة  للأسف مايصلي تعبت من كثر ماانصحه ويصلي وقت ويترك باقي الأوقات في رمضان الان لاتراويح ولاقراءة قرآن ولا عبادة يصوم وماادري اذا هو يصوم صدق او لا *الاسلوب والتعامل اسلوبه ابدا موب طيب معي تدقيقه نقده الدائم انتي ماتعرفين تطبخين انتي ماتنظفين وانتي ماتصلحين و و و و مايملى عينه الا التراب مع اني احاول قد مااقدر لكن للأسف مايعجبه شيء. *مثلا يوم طبخت السحور الساعة ٨ العشاء عسان ارتاح تعبت اطبخ مرتين واغسل مواعين مرتين  كبر الموضوع وجلس يصارخ وانا جاي من فوق فوق وامي وامي وامي تسوي وتصلح يقارني في امه الله يرحمه كثير وانا مااكل في بيتي ذذ2اكله زينة قلي يافلانة لاتسوين هالحركة وبس وانتهى الموضوع ماله داعي الصراخ والمنافخ والعصبية وتزعل وماعاد كلمني يعني حامل وتوني مخلصة فطور وارجع اسوي سحور وومواعين ولا في احد يساعدني قدر شوي. *مايرحم ويقول زوجتي وحامل مرة قايمة الصباح اصيح من التعب واقوله ودني المستشفى الساعة ٩ انت متأخر متأخر على الدوام ويقولي لا بروح للدوام واروح مع اوبر ويوديني للمستشفى وين المودة والرحممة *اذا انسدحت بعد مااسوي الغداء احسه ينقهر داخله قسم بالله يجلس يدور ويحوس ليش منسدحة ليش مانظفت المطبخ كيفي طيب انا بنظفه الوقت اللي يناسبني. المشكلة ياليته على هالدقة والنظافة منعكس هالشيء عليك سراويله على الكرسي وعلى الارض اذا دخلت الشقة نعاله يذبها مناديله كاساته حليبه علب الزبادي كلها يخليها في مكانها ماتشيل شيء بعده  اذا اكلت اتمنى انكده يشيل الصينية ويحطها في المطبخ بعده اذا دخلت بعده بعد الشاور شامبوه ومعجونه وفرشاته كلها اجلس ارتبها. انا مااقوله نظف وزين بس شل اللي بعدك. *مرة كان مع ولدي الألوان هو جالس جنبه يلون  ودخلها في فمه ليش طيب ماانتبهت له وكالعادة قلب الموضوع علي وصياح وصراخ  وكبها في الزبالة ولاعاد كلمني * اذا جيت اروح للدوام وداني في سيارة قديمة وتفشل وسخة ومظهرها ابدا موب زين كارفها اخوه ولد اخوه واخوه الثاني والله العظيم لو انها سيارته الأساسية والله مااقول شيء لكن يوديني فيها واذا جاء يروح للدوام راح في اللكزس حقته وشو هذا حقران ولا ايش بالضبط. *اذا جيت اطلب  منه اي شيء مايتكلم الا بأسلوب المنافخ والصراخ مايعرف يتكلم ب اسلوب زين الله يعافيك ياام فلان سوي كذا حطي كذا. انا وانا وانا *يوم طلبت منه كسوتي  ١٥٠٠ ريال لي للعيد هو راتبه ٢٤ الف هذه ولا شيء بالنسبة له عصب وجلس يصارخ وانا عندي إجار كل العالم يدفعون إجار وامورهم زينهم موب انت الوحيد اللي تدفع هذه هي الحياة والحمدالله هاللي بتدفع له جزء من راتب شهر واحد بس وانا مانيب احاسبه على شيء اروح والعب ولدي واشتري له واحط ولا اقوله اصلا مرة طلعت مع زوجة زميله وصديقتي اقسم بالله معها فيزا رجلها هي وصديقتي يوم جوا يلعبون عيالهم ويشترون لهم ب بطاقات رجالهم وانا والله مااحاسبه على شيء ولا ادقق معه على مصروف او شيء. راتبي في مدرسة اهليه بسيط وفي الإجازات مايمشيء لي شيء. قلت له واذا انت ماتبغى تدفع شيء إجار اذا جاء بيحل تسوي ازمة ذا الإجار وذا الإجار طيب هذه هي الحياة كل الناس يسوون كذا موب انت بالحالك كان ماتزوجت وجلست في بيت ابوك وخالي يصرف عليك تسكن في بيت ابوك بلاش وخلاص لكن تتزوج وتتذمر من الإجار ومن الفواتير واذا طلبت منك شيء عصبت وتصارخ معليش هذه ميب حياة. *لايطلع ولايمشي كل يوم هو يطلع وانا مأجزة ورمضان الوقت طويل اذا قلت له خلنا نطلع نمشي بس  على طول يعيي حتى روحتي ل اهلي مايبغى يودي وعذره ان ولدي يصيح اذا جاء ينزل ومتعلق فيه. وهو يقولي خلي سواق اهلك يوديك هذه اختي يجيبها رجلها واخوي اهلي عندهم سواق واهلها عندهم سواق وقايم بواجبه على اكمل وجه. هو عنده مشكلة مع اخوانه واخواته عمانه ومدرائه زملائه  مافي احد ماتمشكل معه وكل الناس يكرهم. * على ايش انا متزوجة في بيتي اكرف وانظف وارتب ومااسمع الا النقد والذم لامدح ولا كلام حلو ولاتعامل طيب ولارومانسية بينا طول الاسبوع متهاوشين وزعلانين ولاطلعة ولا روحة ولا جيه وفي بيت اهلي مخدومة ومااسمع الا المدح واتمشى اذا طفشت واقضي اغراضي اذا احتجت. موب انتظر متى يجي الويك اند عشان اخلص اغراضي. وش الحل؟ انا والله العظيم ماظلمته ولا قصرت معه صح مانيب كاملة فيني عيوب بس احاول قد مااقدر اني مااقصر ملتزمة، حافظة بيتي، حبيبة مانيب قشرىقايمة بحقوقه اكله وشربه وملابسه و مانيب اكلف عليه شيء فوق طاقتك ولا خراجة ولاجة مااجلس في بيتي يوم واحد قايمة في وليدي مانيب اقصر معه. طبعا قبلها مرتين زعلت في بيت اهلي وكلمه ابوي لكن للأسف ماتعدل مرة رحت ل بيت اهلي لاني شريت لولدي بدلة ب ٥٠٠ ريال انهار وجلس يصارخ الحمدالله انت مقتدر وعطيتني مصروف خلاص كيفي اسوي فيه اللي ابغى وكان هاجرني في فراشي ٦ شهور كأنه اخوي وماينام معاي في الغرفة ينام في الصالة وعذره انك سمنتي وانا والله العظيم ماسمنت الا شوي صار وزني ٦٣ بس الحين صار ينام في الغرفة معي عقب الطقاق والمشاكل. بس ماعاد صرت اناظر وجهه من كثر المشاكل عصبي، مزاجي، كسول، ما يلبي الطلبات تخيلوا مرة من المرات كانت المديرة بتحضر لي واحتاج التصوير جنب بيتي وقلت له ويعصب ويصارخ عشان بس قلت له ودني التصوير. لايودي سوق ولا محلات ولا اي شيء. انا تعبببببببت منه وافكر جديا في الانفصال بس شيئين شايله همها ولدي متعلق فيه لدرجة موب طبيعية وانا حامل الان وثاني شيء اهلي احس اذا تطلقت بينصدمون خصوصا امي ولا ودي اضيق صدورهم. ممكن تنصحوني