أعيش في كابوس اسمه زوج وأتمنى التخلص منه

السلام عليكم و رحمه الله و بركاته انا متجوزه من ٤ سنين و عندي ٣٢ سنه و عندي بنت عندها سنتين جوزي قبل ما اتجوزه كان متجوز و مطلق و عنده بنت سبب طلاقه من الاولى كان بيقول لي انها كانت بتحكي كل شئ لوالدتها و ان اسرار بيته بره البيت بس للاسف طلع كلامه غلط و ده اللي اكتشفته بعد الزواج منه يمكن اكون لما وافقت اتجوزه علشان حسيت ان سني كبر و لازم اتجوز لكن مع فتره الخطوبة اتعلقت بيه و حبيته حصل ما بينا خلافات اثناء فتره الخطوبة و بعدها كتبنا الكتاب بعد خطوبة دامت ٦ شهور بعد كتب الكتاب حصلت مشكلة بيني و بينه و حصل انه مد ايده عليه و ضربني و كنت مصممة على الانفصال و اخدني لي اهله و قعدوا يقولوا انتم مكتوب كتابكم و الناس تقول ايه عليكي مع ان ابنهم ضاربني المهم اتجوزنا و ابتدا طابعه الوحش يظهر بيعامل اهلي بغير احترام هو اصلا بيعامل الناس بتكبر و تعالي و دون احترام غير انه بخيل و بيمد ايده عليا و بيطلع مشاكلنا بره البيت لامه و ابوه و ديما بيزم فيا معاهم و بيحاول يطلع شكلي وحش قدامهم ديما اخرها ضربني بالبوكس بعيني و ورمت عيني و كنت مصممة على الطلاق جه والده البيت عندنا و قال لي بنتك حرام تطلقوا و انا كنت مصممة على الطلاق لكن للاسف ماحصلش انا دلوقت بعد كل الاهانات لي و لي اهلي مش باقيت حتى اطيق اني اشوف وشه انا عايشة في كابوس و نفسي اصحى منه نفسي اطلق و مش عارفة انصحوني اعمل ايه لاني بعد اربع سنين زواج و من كتر الضغط العصبي و النفسي صرت مريضة ضغط