ومع كل الذي فعلت لها للأسف عادت لعادتها القديمة

السلام عليكم متجوز من ١٨ سنة وعندي ولدين وبنت بعد ما اتجوزت وشهر العسل خلص وبعد حمل زوجتي اول مرة والعلاقة الخاصة الحميمية بيني وبين مراتي اتأثرت وبدأت تقل لغاية لما وصلنا ١٦ سنة جواز كنّا بنمارس العلاقة مرة في الأسبوع يوم الجمعة الساعة ٨ صباحاً علشان بقية الأسبوع المدام مش فاضية بين الشغل والأولاد . حاولت أخفف عليها علشان تملى الفراغ اللي انا فيه من خلال ناس تساعد في شغل البيت أو مدرسين للأولاد ، ومرتبها ليها مليش دعوة بيه ، كل ده وانا مش لاقي منها اَي اهتمام الا بالبيت والاكل والأولاد والنظافة وشغلها ومتابعة اللي بيسعدوها في البيت وانا كل اهتمامها بيا أكل ايه وبس. انا عشت في فراغ عاطفي كبير وكتير ومع تقدم السن واعتلال الصحة بدأت اكتأب وهي كمان صحياً بدأت تتراجع . انا رفضت العجز واهتميت بصحتي وجسمي وعملت رياضة وحضرت دراسات عليا رغم سني الكبير وحاولت أتكلم معاها كتير عن احتياجي العاطفي الكبير ليها وكل مرة تقول حاضر ومفيش اَي تغيير. من سنة حاولت ادخل في علاقة ارتباط بمرأة اخرى بدأت تملى الفراغ اللي عندي ، عرفت زوجتي وثارت وهددتني يا الطلاق أو الارتباط بأخرى. رضخت للضغط علشان أولادي وقلتلها نتغير علشان ما نوصلش للنتيجة دي وفعلاً نتيجة الهزة دي بدأت تتغير وتهتم بيا واعتذرت للمر أة الأخرى وضحيت بالارتباط وعشنا ٨ شهور معقولين وأحسن من الاول ، دلوقتي ومع بداية الدراسة والشغل (لأنها مدرسة) بدأت ريما ترجع لعادتها القديمة والفراغ النفسي والعاطفي ماليني واكتأبت مرة اخرى. مش عارف اعمل ايه فكرة الانفصال صعبة علشان الأولاد والسن الكبير بس مش عارف أعيش بسعادة معاها لانها مش عارفة تعطيني اللي انا عاوزه ولما حاولت قعدت فترة قصيرة ورجعت لطبعها الاول تنصحوني بإيه من فضلكم وشكراً.