إهماله ولا مبالاته جعلتني أشعر بفراغ كبير

السلام عليكم ارجوكم ساعدوني ، اقرأوا قصتي للآخر لعلّي لاقي الحل لمشكلتي بنصائحكن. انا فتاة عمري ٢١ سنة. تزوجت من سنة و نص من شخص يكبرني ب عشر سنوات. كنت حبو و دللوا و ما قصر بشي بالبيت، عطول بتزكرو بعيد ميلادو، بعملو حفلات و بجبلو هدايا، هاد كلو كرمال يكون مبسوط و يرضى عني. كان حنون معي و صبور و كريم ما بيقصر بشي بالبيت الحمدلله، بس مشكلتو كانت انو شخص انعزالي جدا بيخاف من العالم الخارجي، اغلب الاحيان سكوتي بيخطط لأمور و شغلات بالمستقبل و ما بشاركني فيها يعني بمعنى اصح مو حاسبلي حساب ابدا. كنت حسو احيانا لئيم، بكل مشكلة بتصير بيناتنا بيتزكرلي كلشي غلطتو من أول من اتجوزتو لحد اللحظة يلي عم نتخانئ فيها، ما كان يتزكر الاشياء المنيحة يلي بعملها معو ابدا، ما بشوف الا الجانب السيء . كانت ايدو كتيير طويلة كأنو ربيان عالضرب. انا بعيلتي و بيتنا بحياتو بابا ما ضرب امي. كان كتير يمد ايدو عليي لما تصير مشكلة يسفئني كفوف احيانا بحط ايدو عتمي كأن بدو يخنئني و كان كل مرة يعتذر و خلي الشغلة تعدي. بعدين صار يتمادى لدرجة يضربني و ينزل الدم من انفي وتمي. حكيت لأهلي و اجو مسافة سبع ساعات بالسيارة اخدوني من عندو و هو حضرتو اصلا ما كان موجود. مر على تواجدي عند اهلي شي شهر بعدها شرف هو و اهلو و كانوا اعدين عادي عم يحكوا مع ابي و لااا ابدا جابوا سيرة الموضوع انو نحنا جايين ناخد فلانة معنا كانوا مستنين انو بابا هو يلي يفتح الموضوع. تاني يوم حملوا حالهن و رجعوا عالمنطقة تبعهن و انا ضليت عند اهلي انصدمنا من هالتصرف بس اتضحلنا انهن ناس نرجسيين و بدهن يربوني كرمال ما عيدها. هلأ مر على تواجدي عند اهلي اربع شهور مع العلم اني حامل بالسادس. و من وقتها ما سأل لا عني و لا على حملي او على دراستي و دوامي و مصروفي. و طبعا انا ما بعتتلو لان صراحة منطري ادام اهلي مااا كان حلو ابدا لما اجو متل الضيوف و راحو هيك. انا قبل زواجي كنت على علاقة مع شب لمدة خمس السنين بس شاءت الظروف انو ما اجتمعنا بسبب انو كل واحد منا سافر على بلد و معد صار في مجال نشوف بعض. انا بعد زواجي و الله ما كنت فكر فيه، كنت كرس كل حياتي لزوجي و بيتي و دراستي. بس من فترة فتحت عصفحة هاد الشب خصوصا انو اهمال زوجي صار يحسسني بانعدام اهميتي انا و اللي ببطني عندو، صرت تزكرت الايام القديمة خصوصا انو هالشخص لما انا تزوجت كان ما زال بيحبني و بدو ياني بس انا اصريت لان كنت حس حالي عم اعمل غلط و لان صار شي و حسيت انو انجرحت كرامتي صار متل انو بدي اتجوز خلص و اهرب منو. و سبحان اللي زوجي تقدملي بعد هالمشكلة يلي صارت مع حبيبي القديم باقل من اسبوعين و فورا وافقت. خلال فترة الخطبة حسيت حالي حبيتو و بدي كمل حياتي معو. مرة بعتلي حبيبي القديم خلال خطبتي و كان عم يحاول يصلح الأمور و اتصل و كان عم يبكي مع انو ما عهدت هيك شي عليه من قبل ابدا. بس مع هيك رفضت و فكرت بخطيبي يلي مالو دخل بهالشي كلو و فعلا تجوزنا بعدها بفترة قصيرة. انا هلا حاسة بفراغ داخلي. بالأول كنت يوميا ابكي بسبب عدم مبالاتو و عدم اهتمامو. بس هلأ صرت افقد مشاعري تجاه زوجي و صرت فكر بعلاقتي القديمة و كيف اني كنت انا و حبيبي القديم بحالة عشق غير عادية. كرمال الله نصحوني انا مجروحة و حاسة بفجوة و فراغ داخلي و عم ادعي الله يفرج كربتي.