تجربتي في الانفصال عن زوج نرجسي وضعيف الشخصية

لأول مره هتكلم عن تجربتي في الانفصال بعد 3 شهور جواز جوازنا كان تقليدي فتره قليله خطوبه سبع شهور ماليش تجارب وقصص حب قبله حياتي كلها كانت دراستي وبعدها شغلي اتعلقت بيه بسرعه جدا مستوانا المادي كان مختلف العيله والاهل لكن التفكير كان متقارب جدا ودا الي كان يهمني اتخطبنا وكنت طايره م السعاده خلاص هيبقالي صاحب وحبيب وزوج من هنا بدأت المشكله بعد ما اغرقنب بالحب والهدايا والاهتمام بدأت طباعه تظهر والي بالنسبالي كنت عادي مش مشكله هعديها وهساعده يغيرها الخصام علي اصغر الامر بالاسبوع والعشر ايام وتكبير الموضوع بشكل مبالغ فيه دخول امه في كل الامور وتأثره الشديد برأيها سواء هي او اخته او اخوه الاكبر الامر ملفتش انتباهي او تغاضيت قبل الفرح بدأ يتهرب ويتلكك ينكد عليا عيشني اسوأ فترات عمري وقرر اننا نسيب بعض والدته واهله تدخلوا وحرفيا كان ناقص يبوسوا ايدي ورجلي وبالفعل اتصالحنا وهو شخصيا كان بيبكي وبيقول انا مش عارف قولت كدا ليه وللاسف انا كنت خلاص اتعلقت بيه بشكل كبير جدا وكملت واتجوزنا (اتجوزنا في محافظه بعيده عن اهلنا) من اول اسبوع صمم اننا نروح بيت اهله ونقعد معاهم اسبوع وعلي استحياءطلبت منه نقعد بس يومين احنا لسه عرايس رفض واتقمص زي الاطفال بالظبط المهم روحنا اهله عنهم عماره كامله ولكن شقته مش جاهزه فا بنبات مع والده ووالدته الامر كان غريب عليا وصعب وخصوصا اني متعودتش علي كدا ابدا وفرق البيت عن بيت اهلي صعب جدا ف النضافه وغيره لكن يشهد الله ما بينت دا او تعاليت بالعكس بلبس الخروج بقف مع والدته ف المطبخ واساعد طول الوقت مقعدش ولكن وانا غير راضيه من جوايا انا عايزه افرح ببيتي انا لسه عروسه بدأ هو يتعمد يظهر قصاد اهله انو حزين والدنيا فوق كتفه بدأت والدته طول الوقت ابني مش فرحان ابني مش سعيد ابني ماله وكأني ف تحقيق وانا بمنتهي السذاجه اقعد اطمنها وابررلها بعد 28 يوم من زواجنا حصل خلاص برضو بسبب بيت اهله واستاذنته اننا نروح حتي لوحدنا واخته متجوزها بعدنا بساعه تروح مع جوزها رفض واتعصب وقالي اعملي حسابك اختي كل ما تحب تسافر هنروحلها وناخدها وانتي هتيجي معايا وكأننا في حرب انا صممت اني مش رايحه لكن تانى يوم صعب عليا اكسر بخاطره وقولتله انا خلاص جايه معاك متزعلش لقيته انفعل وقالي ابعدي عني ونزل راح لاهله ورجع من هناك قامت المشكله (ف حين انو سابني لوحدي ف بيت لا يسكنه غيري عماره كامله انا الشقه الوحيده الي ساكنه متصلش ولا اتصال يتطمن بعتلي واتس رساله فقط) عمل شكله كبيره خدني نزلني لاهلي وراح جاب والدته واخوه الكبير وجه بيت اهلي وهو جاي ف الطريق حكالهم كل التفاصيل من ايام الخطوبه لحد اللحظه دي امه انسانه لا تخاف الله فضلت تزعق وتقول ان ابنها عايش ف مرار ولو تعرف كدا م الاول مكنتش وصلت لهنا واخوه الكبير يقول انتي غيرانه من اختي وحاقده عليها وهو كأنه لم يرا ولم يسمع ف نهايه المشكله ولاني سذاجه وماليش اي تجارب بالحياه حسيت انى المذنبه وروحت معاه علي بيته ولم انطق بحرف يومها فضل يعيط ويقولي انو ندمان انو عمل فيا كدا من شده حبي للشخص دا صعب عليا انو ندمان كدا قولتله خلاص انا مش زعلانه بعدها كلم والدته واخوه ورجعنا علي بيتنا الخاص بينا وبعاتبه ف الي حصل قالي حرفيا دول اهلي وخايفين عليا وبيجيبو حقي حسيت وقتها انو كلمه راجل لا يستحقها ابدا وبرغم كدا كملت وخوفت الله فيه بكل معني الكلمه كنت بشتغل بساعده ف البيت واهلي متكفلين بالاكل والشرب ولكن دا ف نظره مكنش كافي لانه مديون كان منتظر اني اسدد ديونه يعلم الله اني بذلت كل الجهد الي ف العالم علشان اعيش وارضيه نظافه واكل كويس واهتمام بيه وبنفسي والحمد لله ربنا انعم عليا بشهاده كويسه جدا وشكل حلو ولكن طول الوقت حاسه اني قليله ف نظره (طلبت منه كلمه حلوه قالي لفظيا كدا دا ابتزاز انتي عايزه علشان تكوني كويسه اقولك كلام حلو انا مبعرفش اقول ) بعدها وقت ولاده اخته لقيته راكع علي رجلها وبيعيط شعرت بغصه ف قلبي وكأنه سكينه اتحطت جوايا يومها اعترفتله بدا وقولتله اني غصب عني غيرت اتهمني اني بفسد فرحته بولاده اخته وبنكد عليه وفضل مخاصمني فتره وبعدها اتفاجئت انو كلم بنت م الي كان يعرفهم قبلي وبرضو من شده الافترا والجحود فهمني انها هي الي كلمته وقالي اني انسانه بجحه اني كلمت اختها الكبيره وعرفتها ب الي اختها عملته وخاصمني وانا زي الطفله فاهمه انو مش كداب وانها هي الي كلمته (كل ما بفتكر المواقف قلبي بيتعصر واحس اد ايه انا هبله وساذجه ) اتصالحنا وجه وقت مهم ف حياته ف شغله وقفت معاه وساعدته وشجعته (احنا فترات كتيره مبيبقاش بينا علاقه من غير اسباب وطول الوقت كنت فاهمه العيب فيا انا مش ماليه عينه او مبيحبنيش كنا بنفضل بالشهر مفيش حاجه بينا ومفيش خلاف واحنا كويسين) خلص الشهر واول يوم اجازه بعد ما خلصت انا مستنياه نخرج ونتبسط او حتي نقعد ف البيت بس نكون مبسوطين وفاضيين خلاص خلاص شغله لقيته ف قمه ضيقه وبيقولي انو مبيذاكرش بقاله فتره ف الحاه الي بدأها وحاسس مستقبله مش كويس وانو معايا بقا متأخر مبيتقدمش كل دا ف 3شهور جواز بس اشتد الخلاف بينا قولتله انت كدا هتخسرني قالي خسارتك مكسب من شدة غيظي وقهري دلقت عليه الميه وكان هنا بركان وانفجر صور نفسه ع الموبيل كلم اهلي وعرفهم قالي مالكيش مكان هنا وقال لاهلي اننا هنرجع نعيش ف بيت العيله ودا اخر فرصه ليها اترجيته بكل الطرق استرضيته بكل الطرق كان خد قراره يا ارجع اعيش ف بيت اهله يا اتطلق اهلي شافوا انو بيتلكك وانو كارهني اصلا وانا من شدة التعلق كنت رافضه حتي اسمع صوت نفسي وبرغم اعترافه انى انسانه كويسه جدا واني مقصرتش معاه لكن قال دي عصبيه ودا العيب الوحيد فيها وانا هطلقها وبالفعل طلقني نفسي محدش يلومني ويقولي اني غلطانه انا عارفه انى تهاونت في حق نفسي اوي لكن والله فعلا مش بأيدي علي كان بيقولي انو شخص نرجسي بكل صفات النرجسيه كامله ولكن قلبي كن فعلا متعلق بيه انصحوني اعمل ايه وايه الي معملوش تانى بس برفق انا فعلا مش حمل اي خبطه توجعني تانى ولو بكلمه وادعولي