أعاني نفسيا من تصرفات زوجي، فما الحل

أعاني نفسيا من تصرفات زوجي فما الحل انا امرأه ثلاثينيه متزوجه من ٨ سنوات عندى طفلين ولد ٧ سنوات وبنت ١٠ شهور مشكلتى ان جوزى على طول بيتخانق معايا على اتفه الأسباب بحجه انه شخص عصبى وأحيانا بتوصل للضرب حتى وانا حامل فى اولادى الاثنين حصل التصرف ده بس فى خلال الخناقه بيقعد يشتمنى انا واهلى قدام ولادى و ده اكتر شئ بيأذينى

هو شخص غلاط و دائم الشكوى من ضغوطات الحياه و مبيعترفش بوجودى ولا بدورى فالحياه عديم التقدير ليا على كل المستويات على الرغم من انه مبيعرفش يعمل حاجه من غيري او حتى لازم ياخد رأيي فى كل حاجه حاولت اتكلم معاه على مدار مدة زواجنا بكل الطرق بالخناق و بالهدوء وبالخصام و بأنى اتجاهل اهاناته واتعامل معاه كأن شيئا لم يكن حاولت اقربله اكتر جنسيا على الرغم من انى مش بكون راضيه بس كنت بحاول ارضيه هو وبس

انفصلت عنه سنه بدون طلاق ورجعنا تانى قولت اكيد اتعلم كل الطرق جربتها مفيش فايده اعصابى تعبت وانا شخصيه بحب الهدوء والاستقرار وقولت ده نصيبى وهتحمل عشان ولادى وانا جوايا حب ليه اكيد بس فى فتره كنت عايشه معاه بس عشان ولادى ميتحرموش من الاب مبيعتذرش بيستكتر عليا الاعتذار و بيحس انه بيقلل منه احساسي بيقول انه عنده عقدة نقص وشايفنى افضل منه فبيعوض ده باهانتى والانتقاص منى أهلى افضل من اهله و مستوايا احسن من مستواه وتفكيري عقلاني عنه

بس حقيقي انا مبقتش عارفه اعمل ايه ؟ كنت اول جوازنا حساسه جدا دلوقتى بكون مخنوقه ومش عارفه أبكى كنت مؤدبه جدا دلوقتى بفضل ساكته ساكته واوقات مبقدرش اسيطر على نفسي من كتر الضغط حاسه هيجرالى حاجه انا شايله الولاد لوحدى حرفيا هو بيشتغل بس وبيرجع يقعد عالموبايل او ينام حتى مش بيقعد معانا ولا بيتكلم الا قليل جدا متطلب طول الوقت طلباته مبتخلصش مش دى الحياه اللى بتمناها لنفسي ولا لولادى

انا كنت بحلم بحياه اكون فيها سعيده واتحب قد ما بحب انا رومانسيه بطبعى و بحب الضحك والخروجات والسفر هو عكس كل ده نكدى و بيتوتى و لو جواه مشاعر مبيعرفش يعبر عنها يعنى طول فتره جوازنا مسافرناش غير ٣ مرات وكل مره يومين بالكتير فوق كل ده فى خلال الخناقه يفضل يقولى انى ابشع شئ حصله فحياته وانه مش طايق يشوفني وانه نفسه انى اموت او امرض وانى سبب فشله فحياته وانه من غيري هيكون أنجح من كده وانى منفعش اكون زوجه ولا ام وانى شخص فاشل كل ده كلام بيتعاد عليا فالاسبوع الواحد مره او مرتين هز ثقتى فى نفسي و ضعف قوة تحملى و تعبنى نفسيا اعمل ايه ؟؟؟؟؟