أكتب مشكلتي وجسمي كله كدمات ضرب.. فهل أتطلق؟

انا حاسة انى مخنوقة اوى وتعبانة عايزة ابكى ليل ونهار على حالى ،انا اتظلمت لما اتجوزت واحد بطريقة تقليدية هو اكبر منى ب ٨ سنين وخريج معهد وانا خريجة جامعة، بس عادى انا ما اهتمتش بده ابدا بس هو بعد الجواز كان طول الوقت مستكتر نفسه عليا وبيتكبر عليا وبيحب نفسه جدا واذا اختلفنا فى نقاش عادى يتعصب جامد ويضربنى وكانه وحش هجم عليا وبعدين ينام معايا وكان شيئا لم يكن. وده اتكرر ٣مرات ضرب وشتايم قذرة واهانات واتهامات بشعة مينفعش ابدا واحد يتهمها لزوجته وبيشك فيا بدون اى دليل او داعى او اى موقف مثلا حصل فشك فيا. جسمى كله كدمات اثر ضربه ،كان بيشتم على اهلى مع انهم استحملوه عشانى كتييير قبل الجواز فى الخطوبة كان بيعمل مشاكل كتير عشان مكنش بيلتزم بوعوده قدام بابا كان بيتفق على حاجات ويرجع يقول متفقتش .المهم انا حبيته حب مقدرش مهما قولت اوصفه كنت بحبه اكتر من نفسى وجيت على نفسى كتييير واتجرحت كتيير عشانه قولت كله يهون طول ما هو جنبى.انا اتطلقت منه بعد جوازشهرين بس ،اناعندى ٢٥سنة ، معنديش منه اطفال.انا اخر مرة ضربنى كلمت اختى اقولها انه بيضربنى قوليلى اعمل ايه راحت قالت لبابا وماما ولقيتهم بيدقوا الباب وفتحتلهم جم ولموا ملابسى واخذونى معهم وهو قعد يزعق ومكنش عايزهم ياخذونى بس انا جريت وروحت معاهم وكنت مرعوووبة منه جدا من الضرب اللى ضربهولى جالى انهيار عصبى ومكنتش واعية لنفسى من الضرب اهلى اخدونى فى العربية واخدونى على قسم الشرطة وقالولى احكى لقيت نفسى بصرخ وبعيط وبحكى كل حاجةوبعدين روحنا البيت وانا نمت تقريبا اسبوع كامل بصحى وانام وانام واصحى وانا مش فى واعيى مش قادرة اصدق اللى حصل منه وازاى انا هونت عليه وازاى كان فى يوم بيقولى بحبك ومقدرش اعيش من غيرك، انا لحد دلوقتى بفتكر اى يوم حلو بيننا وابكى عليه لكن هو هانت عليه العشرة وكل حاجة حلوة،نسيت اقول انه ضربنى اخر مرة عشان ياخذ مرتبى غصب عنى.انا ساعات بفكر فيه لغاية دلوقتى وساعات بحنله وساعات بحس انى بحبه،وبرجع افكر فى اللى عمله فيا وابقى بكرهه ومش عايزة اسمع اسمه.انا مضطربة جدا ومشاعرى متلخبطة ومش عارفة ايه سبب حنينى ليه بعد كل ده؟؟ ارجوكم ساعدونى احس انى اخدت القرار الصح بالطلاق منه لانى ساعات بحس بالندم