أريد الارتباط بها ولكن اهلها

أنا شاب الحمد لله ناجح ف دراستى و شغلى و شغال وظيفة كويسة و أخلاقى الحمد لله كويسه بس كان عندى مشكلة و تابعت مع الدكاتره و عرفت أن فيه أحتمال كبير مخلفش الحمد لله طبعا بس سألت دكاترة متخصصة و قالولى فيه أمل و أن فيه عمليه ممكن تعملها و ربنا يكرمك. المهم كنت ف دورة تدريبية و كان معانا بنات كتير كان تعاملى مع البنات عدى جدا الحمد لله يعنى تقريبا كنت صارف نظر عن الجواز عشان ظروفى لأن حاسس أن مفيش حد هيوافق عليا عشان الخلفة و أن الاحسن ليا أنى أدور على مطلقة أو على أرملة. و تخلص الدورة التدريبية و يعدى سنتين و أنا ف مشوار مع والدتى أقابل واحدة كانت زميلتى فى الدورة و تتصاحب ع والدتى و عملت معاها مواقف جدعنة بصراحة و بعدها بأربع شهور أمى تقولى أنها فاتحت البنت ف أرتباط و قالتلها على المشكلة و البنت سألت ع الموضوع و موافقة بس تقريبا والدتى محكتش الموضوع مظبوط قوى فالبنت وافقت على الاساس ده. بعدين لما قعدت معاها فى أول قعده شرحت ليها الموضوع كله و بعدين قعدنا نتكلم بقى فى المواضيع العادية بصراحة كنت حاسس قبول من ناحيتها ليا و قبول من ناحيتى ليها بس أكيد كانت عايزه تسأل بناء ع المعلومات الجديدة. دلوقتى هيا بقالها حوالى أكتر من شهرين بتحاول تقنع أهلها و البنت موافقة و راضية و مقتنعة بس أهلها شايفين أن مفيش أمل و حتى مش راضيين يروحوا معايا لدكتور متخصص يسألوه و يسمعو منه رأيه. و أنا بصراحة البنت عجبانى و مقتنع بيها هيا مؤدبة و محترمة و جميلة و ناجحة و كل حاجة كويسة و مقتنعة بيا كشخص بحكم التعامل ف الدورة التدريبية. دلوقتى انا محتار مش عارف أساعدها أزاى أبعد و أسبها و هيا أصلا بنت محترمة جدا و مش هلاقى حد زيها و يكون عارفنى و مقتنع بيا كده و كمان هيا بتحاول تقنع أهلها فأنا هحس أنى بخذلها لو أنسحبت دلوقتى و صرفت نظر و لا أفضل أحاول و أتمسك بيها و أحاول يكون فيه أتصال " مفيش أى أتصال و لا مقابلات ما بينا و الله هيا محترمة جدا " يطمنها أنى لسه عايزها بس خايف أكون بضغط عليها و بحملها فوق طاقتها مهو أهلها مش موافقين و هيا مش هتقدر تواجه لوحدها. بجد مش عارف أزاى أساعدها و أزاى أقنع أهلها و الله أقترحت أنهم يجو معايا عند الدكتور يسألوه بنفسهم و مفيش رد خالص. برضو أزاى أطمنها انى عايزها هيا رغم أن مفيش أتصالات ما بينا " بسهوله الواحد ممكن يجوز مطلقة أو أرمله و معاها طفل بس الفكرة أنى لقيت ديه كويسة و حسيت بجدعنتها و مقتنعة بيا " فى الاخر كده انا عارف طلباتى كتير قوى محتاج دعواتكم ان ربنا يكرمنى بيها و يجعلها زوج صالح ليا و يكرمها بيا و يجعلنى زوج صالح ليها و يرزقنا الذرية الصالحة يا رب