اكتشفت بأنه الإنسان الخطأ بعد حبي الكبير له

السلام عليكم انا مشكلتي ماهي بمشكلة كبيرة وانما ضميري مؤنبني فمن باب الفضفضة انا حااعرضها لكم .. انا بحب شاب من وانا صغيرة وهالشاب هو ولد خالتي صحيت على عين الدنيا عليه وحبيته من بعيد وهو ساكن ببلد غير اللي انا بسكن فيها كنا على تواصل في الفيس من مرة لمرة كان بيرسل لي وهكذا مرت الايام ونقلنا للبلد اللي هو فيها ودخلت جامعة بالسنة الاولى اتطور الاتصال مابيني وبينه بعدها صارحني بحبه انا ماصدقت انه حب حياتي بيبادلني نفس المشاعر واعترفت له بحبي كمان من هنا اتطورت العلاقة وصرنا نتكلم في الجوال من هنا ظهرت لي اشياء بهالشخص انا ماتوقعتها يعني زمان كنت بعيدة منه وحبيته من بعيد بعد قربت منه اكتشفت انه سطحي وانو عقله فاضي وانا هنا مشاعري بدات تبهت اتجاهه دا غير انو كان بطلب مني صور وكان بيكثر غزل مع انو هالفترة كان عمري ١٨ سنة بس كنت واعية وانو الشباب اغلبيتهم اللي كدا بيلعبو مع الايام فعلا اكتشفت انو شخص لعوب وماترك بنت ماحاول يقرب منها وكان اهتمامه بيا بسيط بس بحكم انو اول تجربة انا ماكنت فاهمة هالشي فأنهيت العلاقة.. مرت الايام اتقدملي شاب من جامعتي بس ماحصل نصيب وانتهت الخطبة ولد خالتي هذا بعد انتهى هالموضوع حاول يتقرب لي ثاني وغير كثير من تصرفاته حتى يثبت لي انه اتغير ورجعنا لبعض في هالفترة ظهرت اشياء اسوأ من الاول كان دايما بيحاول انو يسيطر علي في تحركاتي ولو ماحكيتله اني طالعة المكان اللي كذا بيزعل مني جدا وبيقفل مني ممكن توصل لدرجة انو مايكلمني شهر الين انا اعتذر انا صبرت فترة وقلت بيتغير بعدها يوم لاقيته وصرت اتناقش وياه انو انا مش عارفة افهمه وانو مفترض علاقتنا يكون فيها شوية تنازلات وماينفع التحيز لو نحنا مفترض نستمر لقدام لازم نغض النظر عن هالاشياء الصغيرة او انه كل طرف يشوف له طريق كنت بتكلم وهو بطالع على بعيد حشيت انه كلامي في مكان وهو بس معصب ومابيسمعني جلست خمسة دقايق مستنية رده وكان ساكت في النهاية قمت وتركت المكان ورجعت بعدها اختفى وماصار يكلمني رجعت له بالجوال وقالي انتي حرة بحياتك .. بعد فترة رجعنا لبعض تالت مرة وهالمرة كلم امي وكلم امه واخواته على اساس بننخطب لبعض وبنكمل مع بعض هالفترة كان تواصلنا حلو واي شي بس الغلط انو في يوم بدق عليه ومابيرد على مكالماتي واختفى كم يوم بعدها ظهر فجاة واتصل قالي بدي اشوفك وقتها كان الوقت مو مناسب وانا من توتري وخوفي قلت كلام كثير وقفل الخط بوجهي وتاني اختفى لمدة عشرة ايام ولنل وقتها بدق عليه تلفون ومابيرد وبشوفه متواجد في مواقع التواصل ولا كأني في حياته اخر شي قررت انهي هالعلاقة لانو حسيت انها وصلت للنهاية ولطريق مسدود ماله رجعة فأرسلت له رسالة انو انتهينا وانو النصيب بيد ربنا بس مااتمنى تكون نصيبي رد علي ببرود انه كمان يتمنى مااكون نصيبه وانتهت القصة .. اسفة عالاطالة بس الموضوع مزعج جدا لي صح انو انتهى لكن اشعر بانه غلط مني واشعر بالذنب لانو ماافهمت ايش اللي صاير فجاة بدون مبررات منطقية وهل اللي انا سويته صح ايش اقول لامي ولخالتي كيف اقدر اتعامل مع الموضوع دا كدا ..!