أنا وهي والشيطان ثالثنا

مرحبا ..... ترددت كثير قبل ما أرسل مشكلتي ، لكن ممكن يكون الحل هون انا شب بمنتصف العشرينات ، متخرج جديد ، وع وجه زيجة ، بحب بنت صرلي أكثر من 6 سنين ، وهي صبرت معي ، وبآخر سنة إلها بالجامعة هلأ ، وكنت ناوي أول ما تتخرج أطلب إيدها ونتزوج ، يعني والله لا بضحك عليها ولا بتسلى ، قبل حوالي أسبوعين طلعنا أنا وياها كالعادة مشوار ، وبس جيت أوصلها ع البيت ، كانوا أهلها طالعين ونزلت معها ع أساس نقعد شوي وأروح ووالله ما كان ببالي إشي ، لكن الشيطان شاطر وصار اللي صار ، روحت يومها من عندها وأنا بحكي إنو خلص لازم أتقدملها بهالكم يوم ونتزوج ، بس الغريب إني من يومها عم بحاول أتواصل معها وما بترد ، وحت ع الجامعة من ساعتها ما داومت ، مبارح حكت أختها معي ، وبتحكيلي إنها صرلها أسبوعين ما طلعت من غرفتها ، ومش راضية تحكي مع حدا ، وسألتني إزا كنا متخانقين أو لا ، حكيتلها لا ، لكن بالي مشغول عليها ، مش عارف ليش هيك عملت وأنا ناوي أتزوجها والله ، وهاد مش غلطها لحالها غلطي كمان !! إنصحوني شو أعمل